Perezida Lazarus Chakwera wa Malawi yavuze ibiri gukorwa nyuma yaho indege yari itwaye umwungirije n’abandi bategetsi, yaburiwe irengero.

Indege ya Gisirikare yarimo Visi Perezida wa Malawi yaburiwe irengero nkuko bikubiye mu itangazo ryashyizwe hanze na Guverinoma y’iki gihugu. 

Iri tangao ryashyizwe hanze ku wa mbere rimenyesha ko indege ya Gisirikare yarimo Saulos Klaus Chilima ariwe visi perezida wa Malawi n’abandi bategetsi icyenda biki gihugu yaburiwe irengero. 

Rivuga ko iyi ndege yahagurutse ku kibuga cy’indege kiri mu murwa munkuru, Lilongwe, saa tatu n’iminota cumi n’irindwi z’igitondo.  

Byari biteganijwe ko iyi ndege igera ku kibuga cy’indege kiri mu mujyi ufatwa nk’uwa gatatu muri Malawi, saa yine n’iminota ibiri za mugitondo. 

Mu ijambo perezida wa Malawi, Lazarus Chakwera yatangaje abinyujije kuri televisiyo y’igihugu yagize ati: “Indege imaze kugera hejuru y’ikibuga cya Mzuzu, byanze ko isubira hasi kubera ko umupilote atarimo abona neza aho yururukira, ikirere cyari kimeze nabi.” 

Yakomeje avuga ko “Abashinzwe iby’indege baburiye umupilote gusubira i Lilongwe. Ubwo nibwo itumanaho ryahagaze hagati y’abakurikirana urugendo rw’indege n’abari bayitwaye.” 

Perezida wa Malawi yanavuze ko yatabaje ibihugu by’ibituranyi ndetse n’Amerika, u Bwongereza, Noruvege na Israel kugira ngo bifashe igihugu cye gushaka iyo ndege. 

Visi perezida wa Malawi Saulos Klaus Chilima, w’imyaka 51 ni umwe mu biteguye kuziyamamariza umwanya w’umukuru w’iki gihugu mu mwaka utaha. 

Mu 2022, yatawe muri yombi ashinjwa kunyereza umutungo wa leta, ariko nyuma yaje kurekurwa agirwa umwere. 

Dukurikire kumbugankoranyambaga Zacu:

• Facebook
• Twitter

Tunga App yacu uge ubashe gusoma amakuru neza: