Ku gicamunsi cyo kuri uyu wa Mbere tariki ya 06 Gicurasi 2024, ni bwo imodoka yari itwaye abanyeshuri b’inshuke bo ku ishuri rya St Nicolas riherereye mu Mujyi wa Kigali, i Nyamirambo, yakoze impanuka, abagera kuri barindwi barakomereka.
Iyi modoka yakoze impanuka yarimo abana 18 na bamwe mu barimu babo yagonze inzu, mu gihe iyo mpanuka yakomerekeyemo abana barindwi nk’uko Umuvugizi wa Polisi ishami rishinzwe umutekano wo mu muhanda, SP Emmanuel Kayigi, yabitangarije UMUSEKE dukesha iyi nkuru.
SP Kayigi yagize ati “Umushoferi yamanukaga kwa Mutwe, yisanga imodoka yamwuriranye inzu hariya hantu hamanuka. Hakomeretsemo abana barindwi ariko na bo bitari cyane, bajyanwa CHUK abandi barataha.”
Yakomeje avuga ko aba bana bashobora kuvurwa bagakira kuko batakomeretse ku buryo bukomeye. SP Emmanuel Kayigi, avuga ko yaba shoferi n’abandi barimo bo nta kibazo bagize.
Ati “Shoferi nta kibazo yagize n’abana bari kumwe nta kibazo bagize. Imodoka yagonze inzu, irahagarara ariko yasenye inzu, iyo niyo yayitangiriye n’ipoto y’amashanyarazi.”
SP Emmanuel Kayigi, yavuze ko imodoka yari ifite ubwishingizi, gusa haza gukorwa iperereza hakarebwa niba nta burangare bwabayeho cyangwa ikindi kintu cyateye iyo mpanuka.
Umuvugizi wa Polisi ishami rishinzwe umutekano wo mu muhanda yasabye abantu muri rusange Gukurikirana no gusuzuma imodoka. Yongeye gusaba abantu batwara imodoka zitwara abanyeshuri n’abantu muri rusange kwitwararika.
CorridorReports yadabagije abashaka gutunga websites zabo bwite! Dukora website zo mubwoko bukurikira:
- Ubucuruzi (E-commerce)
- Iyamamaza ibikorwa ukora
- Iyo kuranga Akazi (Job listing)
- Iyu Urusengero
- Iya Organization
- Iya Company
Twandikire kuri Whatsapp unyuze hano: https://shorturl.at/cfkBO
