Hubuye indi mirwano ikaze cyane hagati ya M23 n’ihuriro ry’Ingabo zirwana ku ruhande rwa Repubulika Iharanira Demokarasi ya Congo.

Kuri uyu wa Gatatu tariki ya 19 Kamena 2024, nibwo hubuye imirwano ikaze hagati ya M23 n’ihuriro ry’Ingabo zirwana ku ruhande rwa Guverinoma ya Repubulika Iharanira Demokarasi ya Congo, muri teritware ya Rutshuru. 

Mu rucyerera rwo kuri uyu munsi habyutse humvikana urusaku rw’imbunda ziremereye n’intoya, aho uruhande rw’ingabo za Guverinoma rwazindutse rugaba ibitero bikomeye mu birindiro bya M23 biri mu bice byinshi byo muri teritware ya Rutshuru, mu ntara ya Kivu y’Amajyaruguru. 

Amakuru yibanze, avuga ko igitero cya mbere cy’ihuriro ry’Ingabo za Repubulika Iharanira Demokarasi ya Congo cyagabwe mu birindiro bya M23 biri ahitwa Rwindi, ikindi kiza kugabwa mu nkengero za Kanyabayonga. 

Amakuru aturuka ku mirongo y’imbere ku mbuga y’urugamba avuga ko iri huriro ry’Ingabo za Repubulika Iharanira Demokarasi ya Congo ryahababariye ku rwego rutigeze rubaho n’ikindi gihe, ndetse M23 yamaze gusubiza ibyo bitero inyuma, inafata ibikoresho byinshi bya gisirikare byakoreshwaga n’uruhande rwa leta ya  Kinshasa. 

Aya makuru nk’uko akomeza abivuga nuko ingabo zo ku ruhande rwa Guverinoma ya perezida Félix Tshisekedi rwapfiriye gushira, nyuma yuko abarwanyi barwo baguye mu gico cya M23 ubwo bavaga i Kanyabayonga bajya muri Rwindi. 

Binavugwa kandi ko mu mirwano yabereye mu nkengero za centre ya Kanyabayonga, uru ruhande rwa Guverinoma ya  Kinshasa rwahakubitiwe inshuro mu buryo budasanzwe aho M23 yarurasheho ibisasu biremereye birangira uyu mujyi ubayemo igicu cyinshi kivanze n’urwijiji, nk’uko abaturage baherereye muri ibyo bice babitangaje. 

Iyi mirwano yabaye muri iki gitondo yavuzwemo ubukana budasanzwe, ndetse ivugwamo kubabara gukomeye ku ruhande rwa leta ya perezida Félix Tshisekedi. 

Kuri ubu ihuriro ry’Ingabo za RDC riri guhangana na M23 rihunga mu mujyi wa Kanyabayonga. 

Dukurikire kumbugankoranyambaga Zacu:

• Facebook
• Twitter

Tunga App yacu uge ubashe gusoma amakuru neza: